علي بن زايد

[سهيل اليمانى]

السلام عليكم ورحمه الله وبركاته
اتمنا ان تكونوا بالف صحه وعافيه
أخوانى اعجبنى هذا المقال حبيت انقله لكم اتمنا انى وفقت فى الاختيار



**
علي بن زايد شاعر يمني وصلتنا اشعاره عن طريق السماع الى ايامنا هذه . ويعكس مضمون اشعاره حياة ووجود الفلاح اليماني.
ويحتفظ الشعب اليمني بذكرى طيبه عن الشاعر واشعاره التي تسمى بـ الاحكام تقال في مختلف المناسبات .

وهذه بعض من احكام واقوال الحكيم اليماني علي بن زايد :-
· عز القبيلي بلاده ولو تجرع وباها يسير منها بلا ريش ولا ملك ريش جاها
· الدين قبل الوراثه .
· اينما حلّت السبع حلّيت
· لولا القضا عشت بالدين
· من قابص الناس يقبص ولا قبص لا يقول آح
· ليل القضا يشتي الدين
· مافي النجوم الا سهيل
· من قارب الكير يحرق ولا امتلا من غباره
· نخس البتول ينفع الثور
· يا غارتش يا الثريا
· اذا البلس يحرق الحلق فان اللبن ذي دوا له
· اذا معك جار مؤذي الصبر والله يزيله
· اذا نظرت البارق الكوماني ابشرك بالسيل يوم ثاني
· الرد يا مالي الرد عاد المره بتتهرد
· السرق يا مهره الويل اذا خفى كيف لو بان
· الله يسقيك يا عيانه سيل ما يبرح سنه
· اما انت يا سالي الهم نوبك من الهم جالس
· ان البقر تعرف نهيق الابتال وتعرف الراعي وصاحب المال
· اوحيت صوتك وانا راس الجبل واوطيت بين السدامه شجاك
· جحر العلب يا محمد قطع سبول العناقيد
· جهم العنب في خروجه ما بين كرمه وعنقاد
· حامي حميد ابن منصور يحتاج من الناس حامي
· حسبت مالي رجالي وان الرجال ذي هم المال
· حلفت لا اشعر ولا أغني واحمل الهم جلاّبه
· ذي ما يشتى ويخرف لا بخت له في الزراعه
· ذي ما يغارم ويغرم له المنايا تشلّه
· ذي ما مايقع مثل ابن عمّه يقع له جار
· ريح الخريف العوالي والصيف شرقي هليله
· صنعاء اليمن باكيه حزينه على الولد ذي سيروه رهينه
· عويت يا ذيب وارحمني عواك واثار من فارق احبابه عوا
· قال ابن خولان حقّي صاحبي ذي ما معه حقّ ما احد صاحبه
· قبس العنب في احدى عشر والسبع تبدي كرومه
· لا تبيع بكرتك بغداك ولا مرقدك بعشاك
· لاتجعل الغنم راس مالك ولا تخليها من ديارك
· ماعود وحده بلاصي الا بعودين مع عود
· ما ينفعك في عدوك كثره المروّه و الاحسان
· معزيه بعد شهرين مجدده كل الاحزان
· معي من الوقت امارة الفجر اذا اصبح احمر فهو لغزر الامطار
· من كان ابوه يقهر الناس كان القضا في عياله
· من كان شيخه كتابه كان خطاه اكثر من صوابه
· من لم يصبح في الضميد ماله صبح ومساّ في القرا عياله
· وانا احمدك ما لمع برق المطر أو ماسقى من شهاره لا مراد
· يا جولبه قولي لاهل الاعناب ذي ما يلقح ما يذوق التوكاب
· يا حذاره يا رواعي من الصحب قبل الاعراس
· يا ذي الجمال يا نازله لابن راجح حملين زبيب ا خضر وحملين رامح
· يا طالب من المشرق صبوح السلام من المشرق غدا
· يا ليت لي صاحب جيد مثل الشتا ليس يخلف
· يا من تعشّا مع الضيف يصبح يدور غداهم
· آخر زماني خياره من حين شبوا عيالي والما ودّا ثماره
· اذا اليهودي تحنّا في وقت عيد الخضيرا اتلم ولا عاد نانّا
· الحرب حامي وبارد في بارده ضربه بالسيف والحار حرب الموايد
· الناس مثل الغرايس فمنه ما كان حالي ومنه حامض ومضرس
· باب الشريعه مغلّق ان كان لاشي دراهم فالباطل امضا من الحق
· ثور القبيلي حصانه قم يا علي غد ثورك ولا تميل من قباله
· خيار الاحكام الاصلاح يدو من الدين نصفه والنصف لا راح راح
· ساير الجيد واحمل حذاه ولا تساير النذل يردّك من رداك
· طيافه المال اماره اذا لقى خرق عكبر والا فتفقد حراره
· قطعت جرن ا لجلاحه اما حميد ابن منصور عاده يدوّر ملاحه
· قولوا لمن ماله على مدافر النيس يملي مسبه ويسير جبل تيس بدي سباعي للحرور والخيس .
· لا تأمن الدهر ولو طاب افعل على الحب بابين ام العلف سبعه ابواب
· لا عاد من لم يجازى على الصنيعه صنعيه وبالمغازي مغازي
· لو عاش الانسان ماعاش اربعميه طال عمري لابد من داعي الموت
· ما رزق ياتي لجالس الا لأهل الدكاكين ومن قرّا في المدارس
· ما شغب الا من اذبع اذا ضرب صوت ما غار وان طلبوا ما تبرع .
· معي ولد ما هناني علمته الرمي يرمي واحكم وعاود رماني
· والله ما ابيع ثوري ما دامت الريح تقلب شرقي وقبلي عوالي
· يا اهل الغنم يا مساكين ان تمطر السبع والخمس والا فتمطر سكاكين .
· يا حيرتي من زماني امنت من حيث ما اخاف وخفت من حيث اماني
· يا ليت جهران قفوعه وغيل يكلي مرق ثور والحيد الاحمر حوايج
· يقول علي بن زايد عندي تقوم القيامه ولا حنين المجارد
· احذر عمرو تشرك اذا عرض لحم بالدين يجي القضاء وانت مفلس ولا يبالي بهزرك
· ان كنت هارب من الموت ما احد من الموت ناجي وان كنت هارب من الجوع اهرب سحول ابن ناجي
· بالله يا ذا المغنى ما غنّاك هو ضيق او سلا في خاطرك حلفت ما ديب اغني غير ضيق والا قد ابواب قلبي مغلقه
· بيض البقر مثل الاشراف والحمر مثل السلاطين والسود ماطاب منها مثل عبيد المماليك
· حربي وحرب ابن عمي مثل الوجع في الصوابر أو مثل مقرانه السبع ما بين بجما وعاصر
· يا ثورنا طال عمرك طول الهلال اليماني في اخر الشهر شيبه واصبح ولد يوم ثاني
· يا جاريه قولي لسيدي احمد لو ما البقر ما احد طلع على حد يا جاريه ماجور الله مولاش سار باليمن ياجاريه وخلاش
· يا حضرميه في يد الدلال مرسومه بمال ما ياخذك غير صاحب مال اصل من عدّ القفال
· يا خل لو مت نصف الليل من عاد يقوم بالشنار بعدي قد كنت انا في الهوى جمال واليوم راعي لجماله
· يا من بزا ولد غيره يخرج ودمعه همولا ومن زرع مال غيره يخرج وفيه السبولا
· يا من بنا يكوي الناس بجمر حامي كوى به ومن فرح لابن عمه بناكبه فانها به
· يا باديه يا مطله من راس نوبه بهران ما شان ذات الصوت ماشان قالت لنا صوت راعي الذيب يعدي على الضان
· يا ليت لي قلب سالي اشغب على الثور الابيض ولا عليا ولا لي شغب الشتا يا مليحه شغب الشتا سيف الابطال
· اتلم بمدين والحق كسيرين واعلف طلّيين ان جين اغنين وان راحين ما يفقرين
· اوصيك يا جمال لاتسافر عند مطلع سهيل او في مغيب الظوافر يالله جارك من مغيب الظافر عنيت الاولى ما عنيت الاخر اليل برد والنهار هواجر
· محبتك في وسط قلبي مهلله مثل غصن الغيل من حبكم قد نبت ريحان ولا ذرينا ولا سقينا من حبكم بين اسير حافي واطا السنف واحسبه عثرب
· يا اهل العبر يا اهل مسور يا اهل الغروس الرواجي يا اهل الضميد السوارح اهجاجها صرصريه يااهل الجرب عوج الاعرام تشرب من اول نهيه
· يا بنت علي بن زايد يا عاقله يا واطيه يا قافزه سبعه اجبي والثامنه في الحويه يا قاطعه قاع سهمان على مطيه نظيه
· يا طالعي ثبت منزل يا مبكر اخر عشيه سلم على جدة امي تلك العجوز الصبيه وقل لها قوتنا بير جحين دجره نظيه
· يقول علي بن زايد الجاه خير من المال وقال حميد بن منصور المال خير من الجاه والجاه ثوب مصبن اذا نزل سيل اهجاه
· ان صاحبي مثل روحي والا فلا كان صاحب والصاحب الجيد وسيله لحين تبدي بوادي وحين ما تحتضي له يشرفك في المحاضر وفي السنين المحيله .
· زليت في الدهر زله واديت مالي لغيري شريك سارق مزله حل المذابل مواقر ومدرب السيل جله واذا نظر مسبلي زين ودا مسبه وشلّه
· يا من عنيقه عنيق ابريق ومضحكه برق علان وقامته مثل غصن البان يا نازل الجمعه ومنزل ما معك فوق الجمل حملت رمان او سفرجل من غروس ابن البجل
· كيف شرعكم يا اهل عمار في الصهر والخال والجار للصهر ميزه ومقدار والخال في عالي الدار والجار يخطي علينا وليس نخطي على ا لجار ولو قتل خيره العول وخيره العول جسار
· لا تنقدوا شي راسي من الشموس حين نشغب وانتي ولا شاب راسش وماعاد لش زوج يرغب وانا لو شاب راسي اخذت شوذي مكتب لا تعبي يا مليحه ابن الحسين احمد اشيب
· طلعت صنعاء المدينه واني بشوذي صغير صغري جعدة الراس رديت سلامي عليها قالت سلامك على ا لراس وان كنت طالب زواجه اديت مايدو الناس اديت وقر البعيرين من النمانم والاخراص
· ما يجبر الفقر جابر غير البقر والزراعه والا الجمال ذي تسافر تقبل بكل البضاعه والا مره من قبيلي فيها الورع والقناعه تدبر الوقت كله كأنه معاها وداعه تجيعنا حين نشبع والشبع وقت المجاعه
· يا جاريه يا سعاده ردي لي الطير رديه ان كان ذا الطير حانق بالثور نعمان نرضيه وان كان ذا الطير جايع بالبر والسمن نحقيه وان كان ذا الطير حافي من جلد سعدان نحذيه وان كان ذا الطير عاطش من صافي الخمر نسقيه يا طير لا ترتع البر... البّر بّر ابن منصور اذا رما الصيد فاته.
· يا ولدي يا محمد يا الذّ من قال يا به امسيت باربع قضايا مايدري العي ماهي الاوله يا جماعه مالي من الدهر ساهي .. مالي سوا عفو الالهي والثانيه لو درينا .. قدمت مالي تجاهي .. والثالثه ملك الموت يجي والانسان لاهي والرابعه يا جماعه.... البخل شر الدواهي
· احذر من الدين ان يضرك ايضا ولو كان الغريم سلطان ولو معك مخزان وسط قصرك اذ لدعوى ديب ثورت ايمان ولا تلقف للجميل صرك الا اذا فيك القضاء والاحسان كما تحمل بالضيع وقرك يجي القضاء وانك تبيت سهران وصن قصور الناس ميد قصرك من صان قصور الناس قصره اصتان واذا تزوجت اوهن ايش صهرك ولا تغرك ساجيات الاعيان الحرمه الجنس الضعيف تترك ايضا ولو هي مثل بدر شعبان فقلت يا قلب ان يطول هجرك الله له في كل ساعه شان .
............................................

المصدر: كتاب احكام علي بن زايد لـ (( أناطولي أغاريشيف )) من اصدار دار العوده - بيروت

فى الأخير اتمنا ان نشرحها مثل مثل اتمنا التفاعل
تقبلوا تحياتى

[علي أحمد شرف]

لعل من سمات الأدب الشعبي كونه شفاهياً، كما هو الحال مع ما ينسب إلى الحكماء (علي ولد زايد وغيره). ومن سمات هذا الأدب عدم القدرة على توثيقه فهل ما سلف قابل للتوثيق؟
وعلى كل حال استمتعت بمطالعة مشاركتك يا أخ سهيل.

[إبن حريوه السماوي]